Woh aur Tum...

‘ Hum ’ ke do hisse..woh aur Tum.

Woh humesha saath saath..main saath rehkar bhi alag..

Woh ek hokar mazak urhane wale…main unka mazak ban ne wala.

Unke haath mein patang aur maanjha....mere haath mein firki..

Unke liye khuli hawa….mere liye ek khuli khirhki..

Unki sone ki thali,chandi ki katori…mere peetal ke bartan mein unki dal roti..

Unki kismat ka sitare buland…aur meri kismat hi khoti..

Unke dard pe aankhon ka bhar aana….meri khamoshi pe unhi aankhon ka band ho jana..

Unke sapne banenge haqeeqat..mere sapno ka na koi wajood na ehmiyat..

Unki azadi unka haqq tha….meri azadi pe mera hi haqq nahi tha..

Woh kabhi bhookhe na rahe….isliye meri bhookh ka kisi ko khabar na hona..

Unki khushi mein sabka khush hojana…mere gam ko sabka bhulana,mera akele mein rona aur rokar sambhal jana..

Woh aankhon ke tare,raj dulare….main dulara,pyara fir bhi nakara..

Woh garv aur samman…mata-pita ki aan baan shaan…

Main sharmindagi,kamchor,bure waqt ka maara..

Unki musibat mein ‘ main hu tumhare saath ’ ..meri pareshani mein ‘ rakho bhagwan ko yaad ’ Unki ek kharoch aur cheekhna chillana…aaj meri maut pe na koi maatam,na rona na manaana.. Ek duniya mein rehkar bhi hum alag hogaye..

Ek hokar bhi ‘ Hum ’ ,woh aur Tum mein badal gaye..