Main..

Duniya ki bheerh mein chalne laga tha main.
Auron ke kadam se kadam milaye
Unhi ki chaal mein chalne laga tha main.
Apni samajhdari ko,mann ki shanti ko,
Ab ek alag hi roop de chuka tha main.

Pyar ko nafrat mein
Vishvas ko darr mein
Haunsle ko kayarta mein
Pal pal badal raha tha main.

Hamesha haste rehne ki soch mein
Har waqt doosron ki hasi cheen raha tha main.
Khud ko pane ki chah mein
Khud se hi,anjaan,bicharh raha tha main.

Mann mein koi pachtava nahi tha
Aur har shabd mein karhwahat ghol raha tha main.
Har nazar mein mere liye gussa tha

Par sirf ek nazar ki hamdardi dekh saka jab main.

Aayina dekhne se bhi katraane laga,
Khud ko sharmindagi mein doobone laga fir main.
Aaj akela iss baat ka ehsaas kar paa raha hu,
Ke zindagi ki mushkilo se larhne ke liye
Apne astitva ko khone laga tha main.

Zindagi..

Apne ghar ki chatt par
Roz aadhi raat mein aasman ko dekhna
Uss aadhe chaand ko ghanto tak nihaarna
Uske khaalipan mein uske soonepan ko dhoondna..
Aur taaron ki bheerh mein
Ek akeli ummeed ko paana!

Sarhak ke kinare par phoolon ki kyaari mein
Roz Aate jaate unhe khilte dekhna
Ek nanhi,adhkhili kali ko, unke beech alag hi paana
Usey apne larhapan ki ore barhta dekhna
Aur phoolon ke jhund mein kahi
Ek anjaane vishwas ka khojana!

Bachon ko har shaam bageeche mein
Khel khel mein khush hote dekhna..
Unke paas se hi ek nanhi jaan ko..
Sabji ka thaila liye guzarte dekhna
Aur khamosh nigahon ki uski taktaki mein
Ek masoom khwahish ka dabaa reh jana !

Har kadam pe kisi sapne ko toota hi paya
Har ummeed,har vishvas ko khota hi paya
Aur Inn sabko dekhne wala ‘main’
Apni zindagi ko bhi ek morh pe adhoora hi paya
Duniya ki bheerh mein, rishton ki zanjeer mein..
Pyar,dosti,kaam, duniyadaari…sab mein khud ko jakrhaa hi paya
Sunn dimag..band dhadkan….aur shareer ko zinda laash sa payaa!!!

khudkhushi..

Lambee saans lee aur ek kadam uthaya..
Chaku liya aur hatheli ko aage barhaya.
Kaat leta agar maa ko na dekhta..
Uski mamta ke liye khudkhushi ka khayal bhulaya..

Chalte chalte rel ki patri par ja kharha hua
Aankhen band ki aur baith gaya.
Na uthtaa agar janaaze mein rote logo ko na sunta
Apno ko ussi haal mein sochkar mera bhi dil ghabraya..

Laachar sa ek kone mein khud ko kos raha tha..
Jeevan ki musibaton se tang jab jee jhanjorh raha tha.
Ek chote bache ki kilkaari ne mann shaant kar diya
Bachpan ka dimag,aane wale palon se anjaan
Masoom si zindagi,fir bhi hai dil mein usey jeene ka armaan
Iss soch ne aur rulaya par ansuon ki vajah ko badal diya

Zehar bhi pee leta,faansi par khud ko charhaa leta..
Har baar agar dil ki soch ne na bachaya hota
Buzdil banke marne chala tha main
Himmat ne fir se jeena sikhaya
Marne ke kayi tareeke mil jayenge,par jeene ka sirf ek andaaz hai..
Isliye..
Maut ko chorh maine zindagi ko gale lagaya..

"Maa....Khaana ?"

Uss din der se jagaaya tha maa ne..
Taan ki parhne ke liye bhaag bhaag ke jaauu..
Der hogayi thi isliye bina kuch khaaye hi nikal gaya..
Ab yaad aata hai..maa ne roka bhi nahi tha..

Baste mein khaane ka dibba gayab.
Mote larhke ne liya ya mujhse gir gaya ?
Dhoondte dhoondte khaane ka samay bhi nikal gaya..
Ab yaad aata hai..maa ne dibba rakha hi nahi tha..

Jeb mein paise nahi rakhe maa ne..
Bhool gayi ya mujhse gum gaye ?
Sochta raha..aur jalebi wala chalaa gaya..
Ab yaad ataa hai..maa ne paise diye hi nahi the..

Ghar waapis aaya toh koi nahi tha..
Bachpan ki masoomiyat kaho ya anjaanapan ?
Bhook se tang jab kuch nahi mila, toh aansuon se pet bhar liya..
Ab yaad aata hai..ghar pe koi kyun nahi tha..

Maa chupti rahi aur mujhse chupaati rahi.
Uss kachi umar mein maine khud ko majboor payaa.
Chanchal dil ab gumsum tha..
Das saal ke mann ko maine bees ke dimag se samjhaya..

Maa raat ko rasoi mein kitni der tak kaam karti rahi.
Main jaanta tha wo chupa rahi hain..
Aur khaane ko kuch nahi hai..
Main so gaya..par shareer ki kamzori ko haraa na sakaa.
Bachpan ki uss bhookh ko chupaa na sakaa..
Khabar thi ke wo jawaab nahi de sakengi.
Shayad ro dengi aur mujhse nazaren mila na sakengi..
Sharminda nahi karna chahta tha main unhe..
Samajhta tha main unki takleef ko,ye batana tha unhe..
Par…Nahi rok paya main khud ko,aur gala bhar aaya
Na chahte hue bhi mere muh se ye nikal hi gaya….

“Maa…khaana ?”

Tanha-qaid-zindagi..

Achanak sannatte mein meri aankh khuli,
Apne hi andar baat karti ikk awaz suni.
Khwabon mein jo apni tarah ki duniya dekh raha tha main,
Haqeeqat mein wo kuch alag hi andaz se mili.

Khamosh aur akeli zindagi hu main..
Chalta hu,sota hu,akela hi hasta aur rota hua..INSAAN hu main..
Saade aath kadam..bas saade aath kadam ka safar hai mera.
Aage barhte hue ye saade aath kadam ruk kar peeche murh jaate hain..
Dua mein uthte haath, uupar dekhkar neeche jhuk jaate hain.
Sar par khula aakash nahi hai.
Aur paon ke neeche banjar zameen hai.
Haqeeqat mein subah ke ujaale ko bhool gaya hu,
Aur raat ke andhere se meri pakki dosti hai
Sar ki chatt se tapakta paani mere liye barsaat hai.
Aur wo chatt mera ikk seemit aasmaan hai.
Apni saanso se hi hawa ka abhas kartaa hu,
Aur aansuon se samundar ke khaarepan ko chakhta hu..
Hatheliyon ko malkar garmi ka ehsas hota hai,
Aur thande farash par letkar,sukoon mehsus karta hu..
Patjharh saawan basant ya bahaar..
Kab aaye kab gaye..kuch khabar nahi.
Kehte hain ek din mein chaubees ghante hote hain, mere liye toh har pal mein chaubees ghante bhi kuch zyada nahi…

Meri baayin taraf ki deewar mera ek aur saathi hai.
Mere jaisa hi dikhta hai,fark itna hai kuch toota sa hai..
Daahini deewar meri humraz hai..
Sunti rehti hai, kuch bolti nahi..
Mere samne ki deewar apne peeche mere khwab chipayi baithi hai,
Apne dil mein meri duniya ka wo dwar banaye baithi hai.
Mere peeche kharhi deewar mera sahara hai,
Uski peeth se peethe lagaye main ghanto baitha rehta hu..
Hasta hu,rota hu,chup rehta hu,baatein karta hu..
Apne aasmaan se girti ek ek boond ki baarish ko dekhta hu.
Ghutt rahi hai zindagi meri,aur akela hi mar mar ke jeeta hu.
Azaadi ki ummeed hai,
Isliye bahar ki duniya ko kisi tarah yaad karta hu.
Kaid parhi iss zindagi ko,
Chaar deewaron ki choti si duniya mein apni tarah zinda rakhta hu..

Yaad hai mujhe...

Bheega hua din tha wo..
Barsaaton ka mausam tha..
Saawan ki boondon ke saath saath,
Tumhaari nazaron ko bhi mehsus kar pa rahi thi main..
Sar se paaon tak bheege the tum,
Aur nazaakat se sharma rahi thi main..
Humaare pyaar ki shuruyaat thi wo,

Mujhe yaad hai, pehli mulakat thi wo…

Patjharh mein sookhe patton par chalnaa
Haath mein haath daale ghanton baatein karnaa..
Kabhi hasnaa, kabhi jhagarhna, kabhi chup ho jana..
Fir patton ki churmur awaaz sun na,
Aur usme gum hojanaa..
Mera tumse roothna,
Tumhara mujhe manana..
Sukhey mausam ki ikk pyaari saugaat thi wo,

Mujhe yaad hai, humari pehli takrar thi wo…

Basant mein phoolon ke saath,
Humare bhi sapne khil rahe the..
Titliyon ki tarah pankh lagaye, hum bhi khule aasman mein urh rahe the..
Garmiyon ki dhoop mein hum ikk doosre ki chah mein jal rahe the.
Apni duniya mein saath rehne ki kasam khayi thi wo..

Mujhe yaad hai, humaare do dilon ki pehli khwaish thi wo..

Saal ka akhri mausam..
Sardiyon ki kaali raat thi wo.
Mujhse nazar tak na mila paaye,
Aisi kya baat thi wo?
Na maine poocha, na tumse bataya gaya..
Tumhe rok na saki, aur jaane diya..
Jaise thandi hawa ne hoth jama diye ho mere..
Haath paer sun kar diye, hosh gava diye ho mere..

Ab toh yaad bhi nahi kitni baar ye mausam aakar gaye,
Par tum aaj bhi nahi aaye..
Sochti hu tumhe rok hi leti, har ik pal ka vaasta hi deti..

Aur kuch na sahi, par aaj bhi mujhe yaad hai wo..
Tumne kab mujhe zinda maara tha..
Chorhkar gaye the jo..

Aaj bhi nahi bhoolti, humaari akhri mulakaat thi wo…

Maine dekha nahi tha unhe.....

Maine dekha nahi tha unhe,
Sirf soch sakti thi…

Kaise wo mujhe apni god mein khilate,
Bahon mein jhulakar lori sunate
Mujhe sota dekh apni ankhen bhar lete,
Aur mere nanhe haathon ko chorh na paate…

Mere sapno ki urhaan mein wo bhi saath urhte,
Meri gurhiyon ko naam se bulaate..
Gir jaati toh mujhe pyar se uthakar,
Hawa mein bekaar haath ghumaate..
Doosron se zyada mere kareeb hote,
Aur meri nazar mein sabse alag hote..

Kyunki..Maine dekha nahi tha na unhe..
Sirf soch sakti thi…

Roz naye naye tohfe lekar aate,
Chupakar dhoondne ko kehte,aur pagal banaate..
Apni nadaaniyon se humen khushi milti aur
Hasi ke thahaako mein gum ho jaate,
Bas humaari ek apni duniya hoti,
Aur logo ki nazar mein na aate…

Mere har faisle mein meri himmat bante,
Galat hone pe mujhe daant te,aur roothne pe manaate..
Doston ki dosti bhi kam parhti,
Aise mujhe har mushkil mein samjhaate..
Ajeeb se laad se main unhe aur wo mujhe bulaate,
Unke gusse pe mujhe hasi aati,jahaan sab ek awaz se kaamp jaate..

Maine dekha nahi tha unhe,
Sirf soch sakti thi..

Mujhe parhaane ki, kuch banaane ki khwahish rakhte,
Mere haathon mein mehndi sajaane ka khwab dekhte..
Mujhse alag hone ka gam wo mehsus kar paate,
Unke ghar ki izzat hu, aur iss baat ka unhe garv hota..
Main unki beti hu, ye sabko pataa hai,
Kaash main unki pehchaan ban paati, aisa sapna mera bhi hota..

Uss rishtey ka anubhav nahi hai mujhe..
Bas kalpanaaon mein ik tasveer hai,
Saath nahi hain toh kya hua?
Mere aas paas toh hain..
Pita kya hai, kaun hai..main nahi jaanti,
Par mere pita kaun the, uss baat ka garv hai mujhe..
Ek bhi pal nahi bitaya unke saath, magar har pal ki kya ehmiyat hai,
Uska ehsaas toh hai..

Nahi dekha unhe toh koi gam nahi,

unhe apni soch mein zinda rakh sakti hu, is baat ka abhas toh hai…

Lakshya..

Maine chuni thi who raah
Jispe chalna aasan na tha…
Mujhe paani thi wo manzil
Jis tak pauhnchna mumkin na tha…
Khuli aankhon se dekha tha wo sapna
Jise sach karnaa ik chunauti thi…
Main akela tha iss safar mein
Aur apno ka bhi saath na tha…

Mushkilon ne roke the raaste
Par mujhme bhi hauslaa kam na tha..
Asal jeet ki khushi manaani thi
Isliye choti choti haar ka koi gam na tha..
Logon ne dekha, dekhkar hasey, mazaak urhayaa
Kisi ne himmat torhi, kisi ne apni tarah samjhaya..
Ruk jaao, matt barho aage…
Dimaag lagao
Zara socho tum..
Mar jaaoge, kho jaaoge..
Beech raaste mein ho jaaoge gum..

Bauhat suna, bauhat dekha..
Kisi ka bhi samarthan na tha..
Jo karte the mere jazbaaton ki kadar
Unke dil mein bhi koi apnapan na tha..

Drirhtaa thi mujhme, sankalp tha..
Sach, saahas, ummeed se bhara mann bhi tha..
Nahi tha, toh bas ek anubhav na tha..
Jhooth na tha, fareb na tha..
Jiski ghulam thi duniya, wo paisa na tha
Dhairya tha mujhme, aur kahi bhi insaaniyat ka naam na tha..

Ab toh junoon sa sir pe savaar tha
Bas aage barhna tha, aadhe raaste rukna na tha..
Vishvas tha “Uspe”, aur “Khudayi” ko mujhpe..
Ab khud ko aur usey niraash karna na tha..

Patharon pe chalna ab shauk tha mera
Zakhmi hone ka koi khauf na tha..
Girkar sambhalna, seekh liya tha maine.

Ab mere liye, Sooraj tha LAKSHYA, aur usey bhi paana mushkil na tha.....

Kaise bhulaoge?

Aaj tum mujhse door hojaoge..

Apni duniya nayi basaoge..

Fir kisi ajnabee ki bahon mein, apni zindagi lutaoge..

Main maanti hu..tum mujhse door hojaoge..

Apni duniya nayi basaoge..

Par ek baat poochti hu tumse..

kya mujhe dil se nikaal paaoge?

Din beetega meri yaadon mein..
Aur raat, mere khwabon mein bitaoge..

Jab bhi bhoolne ki koshish karoge,

Dar badar bevafayi ki thokar khaaoge..

Raaton ko neend na aane ki wajah kya hai?

Ye samajh na paaoge..

Bheerh mein bhi tanhayi mehsus karoge

Aur achanak soch mein gumsum hojaoge..

Fir bebasi mein aakar..

Band kamre mein, apni megha se jurhi har cheez ko jalaaoge..

Tasveer fenkne lagoge, aur ek aakhri baar muskurakar hothon se lagaoge..

Khushi tumhaare muh pe jhalkegi..

AUR ASHQ ANKHON SE BAHAOGE....

Uska sapna...

Uska sapna.. meri bhi ankhon mein bas gaya..
Ik khwab sanjoya usne, aur wo meri bhi khwahish ban gaya..
Har baat mein usne naam liya, aur mere dimag mein sapne ka chehra ban gaya.
Ik pita ki tarah wo bhavishya ki chinta mein tha, aur mere mann mein mamta ka aangan bantaa gaya..
Wo iss baat se anjaan tha, aur maine jaankar bhi uss sapne ko apne andar dhaaran kiya..
Sapna nahi tha, ab ikk zindagi thi wo..mere andar,saans leti,band aankhon mein basti khushi thi wo..
Uske barhe hone ka intezaar tha..
use bhi aur mujhe bhi…

Pyar tha uske astitva se,

use bhi aur mujhe bhi..

Usey saath rakhne ki iccha thi,
uski bhi aur meri bhi..

Fark sirf itna tha...

khud ke saath ka kuch pata nahi tha...
usey bhi aur mujhe bhi..

Apne beech ki dooriyon ka ehsaas tha..
usey bhi aur mujhe bhi..


Fir bhi....


Uska sapna meri aankhon mein bas gaya
Ik khwab sanjoya usne, aur wo meri bhi khwaish ban gaya...

AURAT...

Sammaan se jurhi sita hu main

pyar mein magn radha bhi hu

shakti hai mujhme, durga hu main..

dhan aur gyan ki devi bhi hu...

Albeli aur mastani, meera hu main..

saundarya se bhari apsara bhi hu..

bhakti mein leen,jogan hai mujhme..

kalpanao mein urhti paree bhi hu..

Dadi sa laad dulaar hai mujhme

Komal aur mamatva,ikk maa bhi hu..

Manchali shararti behan hu main

Pita ki izzat hu,beti bhi hu..

Akankshaye hain mann mein,ikk choti bachchi hai mujhme

Ziddi aur chirhchirha larhrhpan bhi hu..

Aasra deti saheli ban jaauu

Jeevan mein saath deti patni bhi hu..

Prerna ka strota hu, aadarsh hu main

kaamyabi pata saahas bhi hu..

Chaand tak jaane ki kshamta hai mujhme

Kisi ke mann ka vishvas bhi hu..

Apmaanit hui,uutha li gayi

aaropit bhi kiya, sati kara di gayi..

sadiyon se kamzor samjha.

aur samaaj dwara bali charha di gayi..

Pehle marti thi

Ab larhti hu..

Pehle roti thi

Ab hasti hu..

Zindagi hai meri

Wajood hai mera..

Bhagwan dwara sirjit main bhi hu..

Na abhimaan main karu, na tum karo..

Agar aadmi ho tum..

TOH AURAT MAIN BHI HU.....

Kaash..

Hum rote hain, hum haste hain..

kabhi khone ka gam, toh kabhi paakar jaise faste hain..

chote bache ki tarah tak taki lagaye..
hum bhi,aah bharke,auron ki cheezon ko takte hain..

Shayad tabhi woh na milne par,ikk KAASH zuban par rakhte hain..

Hum larhte hain, jhagarhte hain..
roz apne sapno ko sach karne ka dam bharte hain..

aasmani chand ko paane ki khwahish hai..

taaron ko torhne ki zidd hai..

Par uuncha urhne se bhi darte hain..

Tabhi shayad, bhari aankhon se upar dekhkar,ikk KAASH zuban par rakhte hain..

Ummeed ki zindagi jeete hue,hum roz ghutkar marte hain..

sab kuch pakar bhi,khaali pan mein taraste hain..

Mann ki shaanti se zyada, ichhaon ke badal baraste hain..

Shayad tabhi iss mann ko behlaane ke liye,ikk KAASH zuban par rakhte hain...

Kismat..

Aaj baithe baithe apni hatheli ki lakeeron ko dekha..

Soch raha tha kaisi hoti hai ye "Kismat ki rekha".?

Koi seedhi thi,koi tedhi lagi.

Koi beech rah mein tooti lagi..

Pyar, Parivar, Sukh, Shanti, Maya..

Aur kis lakeer pe baitha hai "Maut ka kala saya"?

Apni naadani pe zor se hass diye..

Mutthi band ki, aur manzil ki ore chal diye....

Baarish ki ek boond..

Jaati hui barsaat ek saugaat de gayi..

apni saenkrhon boondon mein se ek mujhe de gayi..

Hatheli pe rakh chorhu, ya kisi pattey ki pyaas bujhaauu..?

Ungliyon se apni failaakar, apne chehre ko iska ehsaas dilauu..?

Ya basaaluu apni ankhon mein hamesha ke liye..

Taaki yaad aane par, isey fir dekh paau...?

Saath

Jab uske aage nikal jaane ka darr na ho..

Aur uske peeche choot jaane ka gam na ho..

Tab aankhen band karke mehsoos karna..

Agar uski sanson ki awaz aaye...

Toh samjho woh saath hai...

Haunslaa..

Bekhabar chal parhe ho jis raah pe tum

Bich jaauungi uss rah pe, woh rah kam na hogi

Ummeed ki kiran hu, roshni hu main

Tumhare sankalp ki mashaal hu main...

Jal jaauungi mushkilo ki aag mein..

Par hausle ki lau kam na hogi....

Khwahish..

Bach pan mein suni thi ek kahaani..
Urhte ghorhon pe savaar,pariyon ki raani.
Suraj ki pehli kiran se roshan hota chandi ka shehar..
Jahaan khushiyon ki barsaat hoti hai,har din har pehar..

Sunte sunte humara sapno mein kho jaana
Aur sote hue neend mein burhburhaana

Shayad baadlon k par ek jahaan aur bhi hai…

Roz subah uthna,aur khirhki se jhaankna..
Nanhe haathon se aankhon ko malnaa,aur masoomiyat se man mein ye sochna

Inn baadlon k paar ek jahaan aur bhi hai..

Rang birangi patang pe paigaam likhkar usey uuncha…..khoob uuncha uurhaana..
Aur tak taki lagaaye dekhte rehnaa…
Doston ka haske poochna,aur unhe garv se ye bataana..

Inn,baadlon k paar ek jahaan aur bhi hai..

Din beetey..mahine saal beet gaye..
Mausam aaye aakar chale gaye..
Ek bhi paigaam ka jawaab nahi ayaa..
Urhte ghorhon ka bhi salaam nahi aaya..

Bachpan ki kalpanaa,larhrhpann ki zidd ban gayi hai..
Iss manchale mann ki ek khwahish ban gayi hai..
Ummeed k pankh lagaauu,aur urh kar dekh aauu..

Hai yakin..k baadlon k paar ek mukkamall jahaan aur bhi hai…

Do Pal...

Do pal gam hai, do pal khushi hai
Kabhi rona hai, kabhi hasi hai
Kabhi khoya hai, toh kabhi paya bhi hai
Kisi pal dhoop, kisi pal chaya bhi hai
Kabhi haar hai, toh kabhi jeet bhi hai
Har pal shor nahi, kisi pal sunta sangeet bhi hai
Do pal koi bicharhta hai, do pal woh milta bhi hai
Murjhaya hua phool, do pal khilta bhi hai…
Har paher andhera nahi, kisi pal ujala bhi hai..

Do pal dukh hai, do pal sukh bhi hai….

Jeelo inn palon ko,jeene mein kya hai?

Kismat pe bharosa na ho,ummeed ki kiran toh hai

Maut toh aani hai ek din, Do pal zindagi toh hai…………

Raat k akelepan mein, tumhe meri yaad aati hai..
Tumhe tanhayi mein marta dekh,meri bhi jaan jaati hai..
Tumhaare gam ki aag mein,mera bhi badan jaltaa hai..
Aur uss lau se andhera tumhara,roshni mein badaltaa hai..

Tumhaare aansu dekh kar, khud bhi roh leti hu..
Unki ehmiyat reh jaaye,isliye apne jamaa leti hu..
Tum akele na raho,toh saath tumhara deti hu..
Mar mar k zinda rehti hu,aur zindagi tumhe deti hu…

Pal pal pighalti hu…pal pal jalti hu..
Tumhe darr na lage isliye pal pal main khud se darti hu….
Kya pataa kab marr jaau,khatam ho jaauu..?
Paani k cheeton se,ya hawaa k ek jhoke se bhujaa di jaauu..?

Jo bhi ho jaise bhi ho..maut aani hi hai agar..
Toh khudaa kare teri sanson ki chuyan se main fanaa ho jaau…